Таны бичсэн ажлын товч намтар таныг илүү цалинтай ажилд орох боломжийг бүрдүүлж болно. Эсвэл таны каръерын хөгжилд саад болж ч болно. Тиймээс та ажлын товч намтараа зөв оновчтой, сайн бичиж амжилтанд хүрэх боломжийг өөртөө нээх хэрэгтэй.
Юуны өмнө ажлын товч намтарынхаа бүтцэд анхаарал тавиарай!
Ажлын товч намтарын бүтэц нь:

1. Овог, нэр, харилцах утас, хаяг
2. Каръерын товч зорилго
3. Мэргэжлийн туршлага
4. Боловсрол

Үүний дараа таны ажлын товч намтар хэр урт байвал тохиромжтойг бод. Дөнгөж сургууль төгссөн эсвэл ажилласан хугацаа бага ажилтан нэг л хуудас ажлын товч намтар бичих нь зүйтэй. 5-7 жил ажилласан, туршлагатай ажилтан хоёр хуудсыг бичвэл сайн. Гурван хуудастай байх нь ховор ба үнэхээр их туршлагатай хүмүүс л бичиж болно.
Та ажлын туршлагаа бичихдээ хамгийн сүүлд ажиллаж байсан ажлаасаа өмнөх ажлуудаа дараалан жагсаан бичээрэй. Ажлын туршлагаа бичиж байгаа хэсэгт ажиллаж байсан компаниуддаа хэдээс хэдэн он хүртэл ажилласнаа жагсаан бичнэ. Таныг ажилд сонгон шалгаруулах менежер “ажиллаж байсан компаниудын тань танилцуулгыг уншмаар байна” гэж хэлэх байх. Тэгвэл та урьд ажиллаж байсан компанийхаа нэр, хаана байрладаг, ямар төрлийн үйл ажиллагаа явуулдаг, мөн жилийн борлуулалт нь ямархуу байдаг талаар бичвэл сонгон шалгууруулалт хийж байгаа менежер таныг ямар байгууллагад ажиллаж байсан болон ямар ур чадвар эзэмшсэн бэ гэдгийг тань мэдэх болно.
Ажиллаж байсан бүх компаниудынхаа доор тухайн компанид ямар албан тушаал дээр ямар ажил үүрэг гүйцэтгэж байсан талаар мөн ажлын хариуцлага, амжилтуудаа салган бичвэл сайн.
Ажилдаа ямархуу хариуцлага хүлээж байснаа дараах байдлаар бичвэл зүгээр:

• Ямар ажил үүргийн хуваарьтай байсан ба түүний хариуцлага ямар байсан талаар,
• Хэдэн хүнтэй багийн ахлах байсан талаар,
• Тухайн компани ямар бүтэцтэй байсан. Шинэ бүтэц гарах өөрчлөлтийн үед ажилласан бол, энэ өөрлөлтөнд ямар хувь нэмэр оруулсан гэх мэт.

Харин амжилтуудаа жагсаан бичихдээ ялангуяа тоон хэмжээгээр буюу хувиар илэрхийлж болох тодорхой зүйлсийг бичээрэй. Жишээ нь: Борлуулалтыг нэг жилийн дотор 20%-иар нэмэгдүүлсэн эсвэл компаний үйл ажиллагаа, бүтцийг өөрчлөөд жилийн 30%-ийн зардлын хэмнэлт хийсэн гэх мэт.
Ингэсний дараагаар боловсролынхоо талаар тодорхой зүйлийг бичээд түүний дараа өөрийн авсан өргөмжлөл, сертификат зэргийг хавсаргах хэрэгтэй.