CareerMongolia.mn

Шудрага зан

admin — Fri, 05 Dec 2008 19:37:48 +0000

Та хэр зэрэг шударга хүн бэ?

Та аливаа асуудлыг даруйхан шийдвэрлэхийг боддог уу, эсвэл аяндаа намжих байх гэж найддаг уу?
Таныг хүлээн зөвшөөрөхгүй байх гэсэн “айдсаас” болж та үнэнийг нуудаг уу?
Та өөрийгөө илүү харагдуулахын тулд бодит байдлыг хэтрүүлэн, эсвэл бөөрөнхийлөн ярьдаг уу?
Та бусдын цаг хугацаа болон эзэмшилд шударгаар ханддаг уу?
Та бусдыг үнэнч шударга байдалд уриалан дэмждэг үү?

Шударга зан (эсрэг чанар нь хуурамч зан)
Болсон явдлыг үнэнээр нь ярьж бусдын итгэлийг хүлээх.

Шударга зангийн гол зарчим.

1. Байгаа байдалтай нүүр тул.
Өөрийгөө хуурахын оронд бодит байдлыг хүлээн зөвшөөрч түүнийг шийдвэрлэхийг бод.

2. Үнэнийг хэл.
Та эвгүй байдалд орох байсан ч бодит байдлыг үнэнээр нь хэл.

3. Бүү хэтрүүл.
Бусдад буруу ойлголт төрүүлэхгүйн тулд бодит байдлын тухай бүрэн мэдээлэл өг.

4. Хулгай, хууран мэхлэл бүү хий.
Бусдын эд хөрөнгө, ашиг сонирхол, итгэх сэтгэлийг хүндэл.

5. Шударга байдлыг дэмж.
Эргэн тойрондоо шударга уур амьсгал бүрдүүлэхийн тулд өөрөө үлгэр жишээ болж, бусдыг шударга байдалд уриалан дууд.

Чин сэтгэл

admin — Fri, 05 Dec 2008 19:34:59 +0000

Та өөрийгөө хэр чин үнэнч гэж боддог вэ?

Та хэрхэн ойлгомжтой ярих вэ гэж боддог уу эсвэл яаж ч ярисан бусад хүн таныг ойлгоно гэж үздэг үү?
Таны хэлж байгаа үг, хийж байгаа үйлдэл тань бусдад таны талаар өрөөсгөл ойлголт төрүүлэх үе байдаг уу?
Хүмүүс таны амьдралыг таны эрхэмлэдэг зүйлсийн илэрхийлэл гэж үзэх үү?
Зөв зүйл хийхгүй байгаагаа зөвтгөн шалтаг тоочдог уу?
Та ямарч үед нэг зангаараа байж чаддаг уу эсвэл нөхцөл байдал, хүмүүст тохирон өөрчлөгддөг үү?

Чин сэтгэл (эсрэг чанар Хоёр нүүрт)
Зөв зүйлийг цэвэр сэтгэлээр шамдан хийх.

Чин шударга байдлыг бий болгох түлхүүр 5 хүчин зүйл.

1. Хэлэх гэснээ л хэл.
Элдэв арга хэрэглэж бусдыг битгий төөрөгдүүл.

2. Үнэнээр нь хэл
Бусдад төрүүлсэн сэтгэгдэл тань бодит байдалтай нийцэж байх хэрэгтэй.

3. Номлодог зүйлээ өөрөө хэрэгжүүл.
Хэлсэн зүйлээ өөрөө хэрэгжүүлдэг бай. Нэгийг хэлээд нөгөөг хийх шиг худал, хуурмаг занг илэрхийлэх зүйл байхгүй.

4. Хоёр нүүр бүү гарга.
Дотоод сэтгэлийн эсэргүүцлээ давж, зөв зүйлийг хий.

5. Өөрийнхөө үнэн байдлыг илэрхийл.
Таны дотоод үзэл бодол ярьж хэлж байгаа зүйлстэй чинь нийцэж байх хэрэгтэй.

Эмх цэгц

admin — Fri, 05 Dec 2008 19:32:40 +0000

Та хэр эмх цэгцтэй хүн бэ?

Аливаа ажлыг хийж дууссаны дараа өөрийн хэрэглэсэн зүйлсээ эмхэлж цэгцлэдэг үү?
Хувийн болон ажил, гэр бүлийнхээ зорилгуудыг тодорхойлж, тэдгээрийг хоорондын тэнцвэрт байдлыг барьж байх арга танд бий юу?
Өөрийг тань хамгийн сайн мэддэг хүмүүс таныг эмх цэгцтэй хүн гэж тодорхойлох уу?
Ажлын болон бусад үед баримталдаг тогтсон зарчим байгаа юу?
Таны амьдралын хэв маяг, аливаа хийж байгаа үйлдэл тань эмх цэгцгүй, урсгалаараа байдаг уу эсвэл утга учиртай эмх цэгцтэй байдаг уу?

Эмх цэгцтэй байдал (эсрэг утга нь эмх замбараагүй)
Үр бүтээлтэй ажиллахын тулд өөрийгөө бэлтгэж, орчин тойрныхоо зүйлсийг зөв зохистой байрлуулах

Эмх цэгцтэй байдлын гол зарчим

1. Зорилгоо тодорхойлох
Зорилгоо тодорхойлохийн тулд өөртөө цаг гарган сайн бод. Тэгээд тэр зорилгоо биелүүлэхээр яг одооноос ажиллаж эхэл.

2. Хэмжүүр тогтоо
Аливаа зүйлд өөрийн стандарт маш чухал бөгөөд түүний дагуу хувийн амьдралд, байгууллагадаа баримтлах зарчим гарган түүнийгээ биелүүлэхийг зорь.

3. Зохион байгуулттай бай
Эмх цэгц гэдэг нь өнгөц харагдах байдлаас илүү хайж байгаа зүйлийг хаанаас олохоо тодорхой мэдэхэд оршино.

4. Замбараагүй байдлаас зайлс хий
Гэр болон ажлын байрны эмх цэгцтэй байдлыг эвдэх бүх зүйлээсээ сал.

5. Даруйхан далд хий.
Таны гарт байгаа зүйл өөрийн гэсэн байрандаа очих ёстой.

Талархах сэтгэл

admin — Fri, 05 Dec 2008 19:29:34 +0000

Та хэр талархах сэтгэлтэй вэ?

Нөхцөл байдал өөрчлөгдөхөд түүнээс ашигтай талыг нь олж харахыг хичээдэг үү эсвэл урьдчилан төлөвлөөгүй өөрчлөлтөнд дургүй юу?
Таныг хүний ач тусыг санаж, талархаж явдаг хүн гэж тодорхойлж болох уу?
Таны амьдралыг сайн сайхан болгоход нөлөөлсөн хүмүүст талархсанаа илэрхийлэхийн тулд та цаг зав гаргадаг уу?
Бусдын ач тусад талархаж явдаг учраас та хэн нэгэнд хариу нэхэлгүйгээр тус хүргэдэг үү?
Бусдаас төсөөлөн хүлээсэн өндөр хүлээлт тань тэдний гаргасан хүчин чармайлтыг үнэлж чадахгүй болгодог уу?

Талархах сэтгэл (эсрэг чанар Ач санадаггүй)
Ач тус хүргэсэн гэдгийг нь хүмүүст үг хэл, үйл хөдлөлөөрөө мэдрүүл!

Талархах сэтгэлийн гол зарчим
1. Сайн сайхныг олж хардаг бай.
Ямар ч бэрхшээл, асуудалд ач тустай тал байдаг тул түүнийг олж харахыг хичээх хэрэгтэй.

2. Энгүүн бай
Үр дүн нь төгс биш ч ядаж хичээн зүтгэснийг нь үнэлэх чадвартай байхын тулд өөрийн хүлээлтийн түвшинг тохируулж байх хэрэгтэй.

3. Таньд ач тус хүргэсэн хүмүүсийг тодруул.
Таныг шүүмжилсэн ч бай, сайшаасан ч бай чин сэтгэлээсээ талархаж байгаарай.

4. Талархсанаа илэрхийлэх цаг зав гарга.
Хүмүүсийг хүндэлж мөн таны амьдралд оруулсан тэдний хувь нэмэрийг үнэлж байгаагаа чин сэтгэлээсээ илэрхийлэн талархах цагийг гаргаж бай.

5. Талархалаа илэрхийл
Таны амьдралд ач тус хүргэгсдэд болон амьдралдаа талархах сэтгэлээ одоо байгаа эргэн тойрны хүмүүстээ цаг зав, хүч чадлаа зориулах замаар илэрхийлээрэй.

Дуулгавартай зан

admin — Fri, 05 Dec 2008 19:26:23 +0000

Та хэр дуулгавартай вэ?

Таньд хүн зааварчилгаа өгвөл хийж байгаа зүйлээ орхин,түүнийг анхааралтай сонсдог уу?
Бусад хүмүүс таныг үүрэг даалгаварт уриалгахан ханддаг гэж хэлэх үү?
Өөрийн хийх дургүй ажилаа хойш тавьдаг уу?
Хийх ёстой зүйлээсээ илүү ихийг хийдэг үү?
Таны өмнөөс хариуцлага хүлээдэг хүмүүс таныг, өгсөн үүрэг даалгаврыг бүрэн гүйцэтгэнэ гэдэгт итгэлтэй байдаг уу?

Дуулгавартай зан (эсрэг утга нь дураараа)
Миний төлөө хариуцлага хүлээсэн хүмүүсийн өгсөн заавар, хүссэн зүйлийг уриалгахнаар биелүүлэх.

Дуулгавартай байдлын гол зарчим

1. Зааварчилгааг гүйцэд сонс
Анхааралтай сонсч, шаардлагатай зүйлсийг тэмдэглэн авч, ойлгомжгүй эргэлзээтэй тохиолдолд тодруулга хийх нь зөвхөн таны хариуцлага юм.

2. Уриалгахан бай
Таны өмнөөс хариуцлага хүлээсэн хүмүүсийн зорилгыг ойлгож, түүнийг биелүүлэхийн төлөө өөрийгөө дайчил.

3. Даруйхан хийж эхэл
Үүрэг даалгавар авмагцаа гүйцэтгэж эхэлвэл түүнийг өгсөн хүн таныг хийж дуусгана гэдэгт итгэх болно.

4. Хийх ёстой зүйлээсээ илүү ихийг хий
Хийх ёстой зүйлээсээ багыг хийж болох байсан ч, эсвэл нөхцөл байдал өөрчлөгдсөн ч шаардлагатай хэмжээнээсээ давуулан биелүүл.

5. Журмыг баримтал
Та өөрийн зарчимдаа үнэнч байж, бусад хүмүүс болон тэдний зорилгыг хүндэтгэ.

Cover letter бичих урлаг

admin — Wed, 12 Nov 2008 15:08:06 +0000

Ямарваа байгууллагын хүний нөөцийн менежерүүд шаардлагатай албан тушаал дээр хүн авахын тулд хэдэн зуун CV, захиа хүлээн авдаг. Тийм учраас та өөрийн CV болон захиагаа олон захиануудын дунд алга болгохгүйн тулд хүний нүдэнд хамгийн түрүүнд тусахаар, эмх цэгцтэй бичих хэрэгтэй. Ингэхийн тулд та дараах зарчмуудыг баримтлаарай.
1-р зарчим:
Таны бичсэн resume, cover letter хүний нүд булаахын тулд нэг форматаар бичигдэх ёстой. Format нь толгойн гарчиг / header /, фонд, сайн чанартай хэвлэх принтер, чанартай цаас, дугтуй гэх мэт ордог. Cover letter, Resume хоёрын фонд, толгойн гарчиг / header/ адилхан байвал цэвэрхэн, цэгцтэй харагддаг.
Мөн таны бичсэн cover letter маш энгийн хэрнээ, мэргэжлийн харагдах ёстой. Учир нь дэндүү өвөрмөц цаас, марзан дизайн нь найзуудын хооронд сайхан харагдахаас мэргэжлийн байж чадахгүй.
2-р зарчим: Уншигчийн нэр албан тушаалыг оруулж бичээрэй
Захиаг чинь унших ёстой менежерийн нэр, албан тушаалыг мэдээд захиандаа оруулаарай. Энэ мэдээллийг та интернетээр болон утсаар бага зэрэг хайлт хийж авч болно. Ингэснээр таныг тус байгууллагыг үнэхээр сонирхож буйг илэрхийлэх болно.
3-р зарчим: Эхний өгүүлбэрээ анхаарал татахуйцаар бич
Та захианыхаа эхний өгүүлбэрийг хүчтэй, сонирхол татахаар бичиж чадвал хүний нөөцийн менежер таны захиаг сонирхон эхнээс нь аваад дуустал уншиж танилцах болно.
Та сонирхож байгаа албан тушаалаа болон яагаад заавал энэ албан тушаал дээр өөрийгөө тохирно гэж үзэж байгаагаа бичих хэрэгтэй. Мөн энэ байгууллагад хэр зэрэг хувь нэмэр оруулж чадахаа маш ойлгомжтойгоор тайлбарлан бичнэ.
4-р зарчим: Өөрийн амжилтуудаа танилцуулаарай
Сонирхож буй албан тушаалтайгаа холбоод өөрийн амжилтуудаа бүлэг болгон жагсаан бич. Энэ нь уншихад хялбар бөгөөд хамгийн чухал мэдээлэл болж чаддаг.Учир нь хүний нөөцийн менежер таныг юуг илүү сайн хийж чаддаг талаар ойлголттой болно гэсэн үг.
5-р зарчим: Төгсгөл бичээрэй
Захианыхаа төгсгөлд та өөрөө эргээд холбоо баринa шүү гэдгээ бичих хэрэгтэй. Яагаад гэвэл таньтай өрсөлдөж байгаа өөр нэг хүн хүний нөөцийн менежер лүү залган өөрийн тань сонирхож буй албан тушаалыг булаан авч магадгүй.
Хэрвээ ажлын байрны зар дээр “Ажил хайгч хүн битгий утасдаарай” гэж бичсэн бол үүнийг хүндэтгэн үзэж ийм төгсгөл бичих хэрэггүй.
Cover letter-ийн гол зорилго нь хүний нөөцийн менежер таны CV-г унших ба таны тухай илүү их мэдээлэл олж авахыг хүсэхэд оршино.

Яаж оффис менежер болох вэ?

admin — Wed, 12 Nov 2008 02:06:54 +0000

Зохион байгуулагч, Нарийн бичиг, Бичээч, Туслах ажилтан, Ресепшн зэрэг албан тушаалууд дээр ажиллан туршлага хуримтлуулах нь Оффис Менежер болох суурийг тавьж өгнө. Мөн үүнээс гадна Бизнесийн Зохион Байгуулалт, Бизнесийн Удирдлагын чиглэлээр суралцан Оффис Менежер болох боломжтой.

ТӨГСГӨЛ
Оффис Менежерийн албан тушаалд ихэнхдээ эмэгтэй хүмүүс ажилладаг. Уг нь заавал эмэгтэй хүн байх шаардлагагүй. Гэхдээ нийтийн дунд, ялангуяа эрчүүдийн дунд Оффис Менежер нь “номхон хүлцэнгүй” ажил учир эмэгтэй хүний л хийх зүйл гэх хандлага их байна. Оффис Менежерийн ажил “номхон, хүлцэнгүй” байдал юмаа гэж ТА жилийн 40,000$ гаруй цалин авдаг (англид) хүнд хэлэх үү?
Эхэндээ Бичээч юмуу Нарийн бичгийн ажилтнаар ажиллаж байгаад дараа нь Оффис Менежер болж сүүлдээ Хүний Нөөцийн Менежер, компаний Гүйцэтгэх захирал болсон хүн ч байдаг юм шүү…

Чамд ямар чадвар, чанар хэрэг болох вэ?

admin — Wed, 12 Nov 2008 02:06:32 +0000

Сайн Оффис Менежер байхын тулд дараах түлхүүр ур чадвар, эв дүй хэрэг болно:
• Харилцааны чадвар сайтай байх – амаар болон бичгээр, компаний дотор болон гадна, нийгмийн янз бүрийн давхаргын хүмүүстэй байнга харилцаанд орох болно. Хүлээцтэй, уян хатан байхаас гадна хэрэгцээтэй үед өөртөө итгэх итгэл өндөртэй байх ёстой.
• Эмх цэгцтэй, зохион байгуулалт сайтай, олон даалгаварыг нэг дор гүйцэтгэх – Хэлсэн ярьсан зүйлсээ нарийн тэмдэглэж авах, боссын өрөөний цонхны доорх эвдэрсэн усны хоолойг янзлуулахаа байрны эзэнд амалсандаа хүрэх, принтерийн хор дуусахаас өмнө цэнэглүүлэх, цэвэрлэгээний ажилтнуудын ажлын цагын хуваарийг зохицуулж байхын тулд та зохион байгуулалт маш сайтай байхаас өөр аргагүй.
• Энгийн, “хар ухаан”, мэдрэмжтэй байх нь оффис менежерийн зайлшгүй чухал чанар юм – Олон жижиг сажиг зүйлс дээр өөрөө бие даан шийдвэр гаргах хэрэгтэй бөгөөд асуудал гарах бүрд, хойшлуулшгүй чухал асуудал шийдвэрлэхээр суугаа Захирал руугаа утасдаад байх хэрэггүй. Өөрөөр хэлбэл “мэдрэмж” гэдэг нь: олон асуудлуудаас аль нь үнэхээр чухал бөгөөд Зөвлөлийн Хуралд суугаа Захиралынхаа садаа болсонд чинь уурлах эсэхийг үл тоон залгах хэрэгтэй вэ гэдгийг мэдрэхэд оршино.
• Үнэнч шударгын, итгэл найдварын оч байх – Оффис менежер ихэнхдээ оффисдоо суурин байдаг учир бусад ажилтнуудын хувьд хамгийн түрүүлж барих “барьц” болдог – Яаралтай асуудал тулгаран оффис руу залгахад уг дуудлагыг хүлээн авч асуудлыг шийдвэрлэх “эхний авралын гарц” нь оффис менежер байх ёстой.
Шударга байх нь ялангуяа багахан хэмжээтэй оффисийн мөнгөний зарцуулалтын тал дээр илүү чухал чанараар тодорно.

Оффис менежер юу хийдэг вэ?

admin — Wed, 12 Nov 2008 02:06:02 +0000

Энэ албан тушаалын талаарх нарийн тогстон “Ажил үүргийн тодорхойлолт” байдаггүй. Ямархуу ажилбар гүйцэтгэх нь компанийн хэмжээ, үйл ажиллагааны чиглэлээс нь хамаардаг.
Ерөнхийдөө оффис менежерийн гүйцэтгэх түлхүүр үүргүүдийг дурдвал:

Бичгийн хэрэгсэлийн хүрэлцээтэй байдлыг хянах, цаг тухайд нь захиалах
Оффисийг түрээслүүлэгч байрны эзэнтэй найрсаг харилцааг үүсгэх
Ирэх болон илгээх захидлуудад хяналт тавих (Энэ нь зарим компанид хүлээн авах ажилтны /ресепшн/ үүрэг байж болно. Гэхдээ л ерөнхий хариуцлагыг хэзээд оффис менежер үүрдэг)
Ажилтнуудад хэрэгтэй үед нь унаа олж өгөх
Цэвэрлэгээг зохион байгуулах, оффист бага сага засварыг хийлгэх, цай кофены хангамж зэрэг оффисийн салшгүй хэрэгцээний зүйлсийг урдчилан бэлтгэх
Оффисийн багахан төсөв мөнгийг “барьж”, өдөр тутмын нарийн бүртгэл хөтлөн, кассын талон, падаан зэрэг зардлын бүртгэлд оруулах баримтуудыг цуглуулан хадгалах
Даргын нарийн бичиг, захиргааны болон хүлээн авах ажилтнуудыг /ресепшн/ удирдах шугаман менежментийн үүрэг гүйцэтгэхийн тулд багийн лидер байх

Энэ жагсаалт нь оффис менежерийн гүйцэтгэх үүргийг бүгдийг багтааж чадаагүй нь ойлгомжтой. Дараагийн удаа холбогдох бусад үүргүүдийг нэмж оруулна аа.

Ярилцлаганд бэлтгэх шилдэг 10 асуулт.

admin — Wed, 12 Nov 2008 15:03:21 +0000

Ярилцлаганд орж байхад цочроосон хэцүү асуултууд заримдаа тавигддаг. Түүнд хариулт олоход хэцүү бөгөөд хүн эвгүй байдалд амархан орж болно. Иймд заавал тавигддаг, наад захын доорх 10 асуултанд бэлтгэж өөртөө итгэх итгэлтэй болох нь ярилцлаганд амжилт олох үндэс болно.
1. Таны сул тал юу вэ?
Энэ бол хамгийн аймшигтай асуултанд тооцогддог. Энэ асуултанд хариулахдаа өөрийн сул талыг үнэнч шударгаар хэл. Дараа нь түүнийг хэрхэн хүчтэй талаараа нөхөж даван туулж чадахаа илүү дэлгэрэнгүй тайлбарлаарай. Хувь хүнийхээ мөн чанаруудыг хэлсний хэрэггүй. Харин өөрийн ажил хэрэгтэй холбоотой чадваруудаа тодорхой дэлгэх хэрэгтэй. Жишээ: Би харилцааны ур чадвар муутай. Гэхдээ үүнийгээ сайжруулах талаар байнга зүтгэл гаргадаг. Сайхан HumanFortis компаний харилцааны сургалтанд суусан. Энэ нь надад их тус болсон.

2. Та манай байгууллагад ажилд орсноор юу хийж чадах вэ?
Өөрийхөө туршлагыг товчхон танилцуул. Жишээ: Банк санхүүгийн салбарт 5 жил ажиллаа. Үүгээр байгууллагын мөнгийг хэрхэн хэмнэж болохыг сурсан. Танай байгууллагат энэ талаар өөрийн хувь нэмрээ оруулж чадна гэж бодож байна.

3. Та яагаад манай байгууллагыг сонгосон бэ?
Ярилцлага хийж байгаа хүнд та энэ асуудлын талаар үнэхээр хянуур бодож үзсэн гэдгээ харуулах хэрэгтэй. Та CV-гээ зүгээр л ийш тийш нь тарааж байгаа биш харин яг орох хүсэлтэй байгаа газартаа хандаж байгаа бөгөөд тухайн байгууллагын зорилго амьдралын зарчимтай тань нийцсэн, хийж байгаа ажлынх төлөө сэтгэлээрээ ажиллаж чадах хэд хэдэн байгуулагыг сонгосон гэдгээ хэл.

4. Та ямар зорилготой вэ?
Хэтийн зорилгыг дурдахын оронд өөрийн дунд болон ойрын үеийн зорилгыг ярьсан нь дээр байдаг. Их холын ирээдүй бол тийм ч сонин биш шүү дээ. Жишээ: Миний хамгийн ойрын зорилго бол өсч хөгжиж байгаа компанид ажилд орох байна. Харин миний хэтийн зорилго уг орсон компани маань хэрхэн хөгжихөөс шалтгаална. Цаашдаа би өөрийгөө хөгжүүлж, өндөр хариуцлагатай албан тушаалд ажиллахын төлөө байгаа.

5. Урдны ажлаасаа ямар шалтгааны улмаас гарсан бэ? /Яагаад гарах гэж төлөвлөж байгаа вэ?/
Ажилгүй байсан ч эерэг аргаар үүнийг илэрхийлэхийг бодоорой. Жишээ: Би 2 ч удаагийн цомхотголын ард үлдсэн. Гэвч хамгийн сүүлд байгууллага маань ажилчдынхаа 20%-ийг цомхотгож би түүнд нь багтсан.
Хэрвээ одоо ажилаж байгаа бол ирээдүйн ажлаасаа юу хүсч байгаагаа хэлээрэй. Жишээ: Би энэ байгууллагад 2 жил ажиллаа. Харин одоо сайн баг, хамт олон бүрдүүлдэг компанид ажиллах шийдвэр гаргаад байна. Тийм байгууллагад ороод ажлын туршлагынхаа дагуу өөрийн гэсэн хувь нэмрээ оруулахыг хүсэж байна.

6. Та ажиллаж байх хугацаандаа хэзээ хамгийн сэтгэл ханамжтай байсан бэ?
Ярилцлага хийж байгаа хүн таныг хэрхэн идэвхжүүлж болохыг мэдмээр байгаа. Боломжтой бол өөрийнхөө туршлагаас нэгийг хэлбэл их сайн. Ямар үед, ямар зүйл хийж байхдаа хамгийн сэтгэл хангалуун байсан бэ гэдгээс чинь таны юу хүсдэгийг тухайн хүн ойлгох болно. Жишээ: Би Үйлчлүүлэгчидтэй шууд нүүр тулан уулзаж тэдний асуудлыг шийдэн, хэрэгцээг нь хангаж байхдаа хамгийн сэтгэл хангалуун байсан. Миний хувьд маш чухал үе байсан.

7. Бусад хүмүүс хийж чаддаггүй харин таны хамгийн сайн хийж чаддаг зүйл юу вэ?
Та бусдаас юугаар ялгаатай вэ? Туршлага, чадвар, зан чанаруудаа илэрхийлж товчхон тайлбарлах хэрэгтэй. Жишээ: Би IT-ийн талаар чадвар сайтай бөгөөд үйлчлүүлэгчтэй харилцахдаа сайн. Иймд би техник, технологийн талаар үйлчлүүлэгчид маш сайн тайлбарлаж өгч чадна.

8. Танай дарга таны талаар ямар тодорхойлолт өгөх бол?
Дарга нар тань таныг өмнө нь яаж магтаж байсныг нэрэлхэлгүйгээр хэлэх хэрэгтэй. Өөрөөр хэлбэл өөр хүний үгээр өөрийгөө магтаж болно. Жишээ: манай дарга намайг хамгийн сайн дизайнер гэдэг. Мөн итгэж, найддаг гэж байсан. Миний хөгжилтэй занд тэр дуртай.

9. Ямар цалин хүсч байна?
Хэрвээ ажил олгогч цалингийн интервалаа хэлбэл танд хялбар байх болно. Гэхдээ хэлэхгүй байж болно. Тиймээс та юу ч гэсэн ийм ажил дээр таны насны, тань шиг туршлагатай хүмүүс хэдийг авдаг вэ гэдэг талаар мэдээлэлтэй байх хэрэгтэй. Мөн та өөрөө хэдийг авбал зүгээр, хэдээс доош дэмий гэдгийг сайн тогтоогоорой. Нэг боломжийн хариу бол “Бид ойлголцож чадах байх. Та бүхэн над шиг хүмүүст ямар цалин өгдөг вэ?” гэж хэлэх юм.

10. Та амьтан байсан бол ямар амьтан байх байсан бол?
Зарим ярилцлага дээр иймэрхүү сэтгэлзүйн асуулт асууж таны сэтгэх хурдыг шалгаж болно. Хэрвээ та бүжин туулай гэвэл дэндүү зөөлөн. Харин арслан гэж хариулбал дэндүү түрэмгий гэж төсөөлөгдөж магадгүй. Та ямар хүн гэж харагдмаар байгаагаа, тухайн байгуулагад ямар хүн хэрэгтэй байгаагаа харьцуулан бодож үзээрэй.